Organisaziun

Ils 11-02-2000 ei l’Uniun da Spitex Cadi vegnida fundada a Mustér. Tenor las prescripziuns cantunalas ein las vischnauncas obligadas da porscher als habitonts in agid sufficient da tgira sco era tractament medicinal. Quei mandat han las vischnauncas dalla Cadi surdau a Spitex Cadi. Ils detagls dalla incumbensa ein descrets ella cunvegnientscha da prestaziun individuala.

Il diember da habitonts ella regiun dalla Cadi dumbra ca. 7’300. La distanza denter ils dus loghens ils pli in ord l’auter ei ca. 35 km. Cun 11 plazzas cumpleinas quenta Spitex Cadi tier ina dallas pintgas organisaziuns. 33 collaboraturs/as s’engaschan per il beinstar dalla clientella. Rodund 500 habitonts dalla Cadi ein commembers e portan aschia l’uniun.

Dapi l’introducziun dalla nova lescha da finanziaziun igl onn 2011 vegn negin deficit pli surprius ni dallas vischnauncas ni dil cantun. Il cantun separticipescha cun 55 % e las vischnauncas cun 45 % vid ils cuosts dallas prestaziuns tenor las differentas classas da prestaziun ch’ein buca curclai. Quei vala per ils habitonts dil Grischun respectivamein dalla Cadi.