Maletg empalont

Cultura da lungatg

Romontsch ei nies lungatg. Per nos clients ei il lungatg da conversaziun – tenor pusseivladad – romontsch. Il lungatg tudestg vegn applicaus leu nua ch’ei fa da basegns.

Client

Nies pensum principal ei la tgira ed il tractament dils clients. Nus s’inscuntrein cun respect e stema enviers nos clients. Nus possibilitein a carstgauns che basegnan tgira ed accumpignament da saver viver a casa en buna qualitad.

Collaboraturs

Ils collaboraturs ein il pli impurtont potenzial da noss’organisaziun. Nus possibilitein spazi liber per agir individual. La competenza dil fatg sco era la sociala e persunala vegn promovida entras scolaziun adequata ed ei il dretg sco era l’obligaziun da mintga collaboratur.

Uniun

Nus ademplin l’incumbensa dallas vischnauncas dalla Cadi sco era las pretensiuns e normas da qualitad dil cantun. Nies menaschi vegn menaus a moda efficienta, effectiva, orientada al marcau, transparenta e cumparegliabla ella regiun. Nus s’engaschein che nos purtaders (cantun, vischnauncas, segiradas e clients) separticipeschien adequat a nossas prestaziuns. Nos commembers sustegnan la collaboraziun.

Collaboraziun

Nus sespruein per ina activa e buna collaboraziun cun autras instituziuns, persunas dil fatg da sanadad ed instituziuns socialas. Nossa collaboraziun sebasa sin valetas humanas, capientscha e sensibilitad enviers auters, senza risguardar origin, religiun ni status social. Nus essan aviarts per inspiraziun e critica.

Confamiliars

Cun consentiment dils clients ein ils confamiliars nossas persunas da contact pertuccont tgira ed accumpignament. Ei il client cuntents, risguardein nus ils giavischs ed impuls dils confamiliars tenor nossas pusseivladads. Nus s’orientein tenor ils basegns dil client. La collaboraziun sco era la communicaziun culs confamiliars ein per nus da gronda impurtonza.